Саран ошсо ютась «Паро койть» фестивалесь-пелькстамось. (В Саранске состоялся фестиваль-конкурс «Добрые традиции») ЭРЗЯ

Эрьва раськенть эсензэ историязо, коензэ – кирданзо, келезэ. Весе тень эряви ванстомс. Минек регионсонок эрить ламо раськеть. Эрьвась сынст эйстэ канды минек культурантень мезеяк од, мезе-бути эсензэ, лия ёнов а молиця. Секскак сон истямо ламо ёнксонь ды ламо чачонь.  Фестивалесь-пелькстамось ютавтови омбоцеде. Эряви меремс, што сон теевсь вечкевиксэкс ды учовиксэкс. Эрьва ие пелькстыцятнень ламочись яла касы. Фестиваленть лувсо ульнесь панжозь мелень саиця выставка. Эрьва раськесь невтизе эсь культурань, фольклоронь, шкинемань башкачитнень. Тесэ ламо викшневкст, кодазь кедьёнкст, чувтосто керсевкст, эрзянь ды мокшонь палясо някат, човалясто теезь цецят, артозь вакант ды ламо-ламо мезе лия. Фестиваленть прявт путовксозо – ванстомс койтнень-кирдатнень, теемс ялгаксчинь сюлмот лия раськетнень марто.