Саран ошонь лётно-технической школадо. (ЭРЗЯ)
Умарьговось сюпав пошчисэ, конат кандовить авиациянтень. Масторонок авиациянть эрямопингензэ марто кеместэ сюлмазь Мордовияськак. Саемга, Темниковань уездэнь чачозесь Александр Васильев – масторонь келес содавикс лётчик, кона ульнесь васенцетнень ютксо, кие эрямонзо алтызе ливтнемантень. 1930-це иесь ловови Советской авиациянь ушодома юрокс. 1935-це иестэ Саран ошсо пурнави П.Ф.Федосеенко лемсэ авиаклуб. Се шкастонть тозонь ульнесть ламо сыцят, ансяк сайсть аволь весень. Кочкамось мольсь аволь ансяк шумбрачинь коряс, домка ваннома сы шкань тонавтницятне ютасть политикань ёндояк. Улеманзо перть авиаклубось нолдась Советской Союзонь 10 геройть, конатненень те лемесь максозель Ине Отечественной войнань иетнестэ.
50-це иетнестэ масторонть келес мольсть покш полавтовомат: авиациясь ютась од самолётнэс, а тенень эрявсть инструкторт, конат тонавтовольть ливтнеме. Тень кисэ минек ошсо панжови лётно-технической школа. Прявт ошонок пурназель а стяко: сеть иетнестэ аэроклубдо башка ульнесть кавто аэродромт – гражданской ды военной. Ды, кода кортасть, ливтницятне – республикасонок зярдояк арасель берянь перть пелькс!
Тонавтницятнень ютксо, цёрадо башка, тонавтнесть тейтертькак. Валентина Ковшова, военной ды трудовой подвигень мемориальной музеень наукань тевень коряс прявтонь полавтыцясь васняяк лецтясы Марина Поповичень. Галина Мухинань, кона котоксть ульнесь парашютонь спортонь коряс Масторонь чемпионокс. Ляля Насухановань – Чечнясо чачозенть, васенце ава-ливтницянть. Ираида Вертипрахова – СССР-нь заслуженной пилотось истяжо тонавтнесь Саран ошсо. Мордовиянь эрицятнень ютксояк ули ава, кона эрямонзо сюлмизе ливтнеманть марто – та Ардатова буень чачозесь, Нина Литюшкина, вейкине ава-пилот, кона казезь Нестеровонь медальсэ.
1963-це иестэ лётно-технической школась пекстазель. Сонзэ таркас панжозель авиациясь тонавтомань центра. Эрьва ие те курось минек Масторонть туртов нолдась сядо ливтницят.