Санкт – Петербургонь раськень кудосонть панжозель фотографонть Юлия Алмаметовань «Святая, как хлеб, деревенька моя» фотовыставкась. (ЭРЗЯ)

Сонзэ фотографиятне аволь весть невтезельть Санкт-Петербургсо, Московсо, Нарвасо. Теде тенек пачтясь Санкт-Петербургонь ды Ленинград ёнксонь эрзя-мокшонь раськень «Шумбрат» фондонь важодицясь Марина Романовская. Персональной выставкасонть невтевить фотографият, конатнень авторось теинзе Зубова-Полянань буень Ширингуши посёлкасонть, косо чачсь. Фотографиятнесэ невтеви ломанень эрямось. Сынст лангс ванозь, эрьвась несы тиринь веленть. Панжизе выставканть «Санкт-Петербургонь ды Ленинград ёнксонь эрзя-мокшонь раськень «Шумбрат» аволь коммерческой фондонь прявтось Сергей Артемов. Казизе художникенть выставкасо фотографиятнень невтемань кисэ Сюконямонь валсо.  Лембе валт невтеманть коряс ёвтась Санкт-Петербургонь раськень кудонь куронь прявтось Марина Быстрова. Выставкас сыцятне паро мельсэ ванызь фотографиятнень, залсонть марявсть эрзянь, мокшонь, рузонь, татаронь кельтне. Невтемась киньгак эзизе кадо мельтеме. Эрьвась одс ледстизе тиринь ёнксонть, эйкакшпингенть.