Самсонкинонь творческяй илядец (МОКША)

Сембе эряфонц Пётр  Самсонкин  лемдезе  журналистикати. Работась эрь  кодама газетаса, Ковылкинскяй  телевиденияса,  тянемс кирди  соткс «Мордовиянь Радиоть»  мархта.  Фотокорреспондентсь,   книгань авторсь тячиень шис аф  кадондсы сёрмадоманц и покоди  «Голос Примокшанья»   Ковылкинскяй районнай  газетаса. Творческяй  илядьс   поздравляндамс   юбилярть  сашендсть  коллеганза, райононь  оцюнятне, педагокне, раднянза   и мала   ломаненза. Лама  цебярь  и лямбе  валда кайгсь смузю   журналистть лемс.  Самсонкинонь  творчестванц   лац содасазь аф   аньцек  Ковылкинскяй  райононь эряйхне,  но и лувихне  марнек республикава. Юбилярсь  азондозень   кочкафненди   эсь лятфнеманзон. Эсь ширдест   инжихне   казьсть    музыкальнай  поздравленият,  панчфт  и питни  казнет.  Аф ваномок  кизонзон лангс, Пётр  Самсонкин  пяшксе  вийда сёрмадомс. Морхне,  кштиматне,   стихне  тиезь творческяй  илядьть  афкуксонь  праздникокс. Сембось   тя  кеподезе  Самсонкинонь  мяленц,    но инь питни  казнекс  теенза  лядонды   лувихнень  кельгомасна.