Самара ёнксонь Борской буесэ вельмевтевить эрзянь келесь ды раськень кезэрень койтне-кирдатне. (ЭРЗЯ)
Мордовия Республикасо эрзятнеде ды мокшотнеде эрить ансяк колмоце пельксэсь. Минек раськень ломантне сравтовсть Самарань, Пензань, Оренбургонь, Ульяновскоень, Нижегородской, Саратовской ёнкстнэсэ, Башкортостан, Татарстан, Чувашия республикатнесэ. Малав весе сынь бажить а стувтнемс келенть, кезэрень койтнень-кирдатнень. Истятнень ютксо Самара ёнксонь эрицясь Таиса Степанова. Тиринь ёнкссо те алкуксонь эрзяванть содасызь весе. 2013-це иес Таиса Николаевна эрясь Самарасо, мейле тензэ савсь кадомс важодеманзо ды велявтомс Самара ёнксонь Коноваловка велев. Самай тесэ сон ютавтызе эйкакшпоранзо. Вете иень перть Таиса Степанова вельмевти тиринь ёнкссо кезэрень койтнень-кирдатнень, сонзэ мелензэ коряс пурназель этнографиянь музей. Таиса Николаевна бажась, штобу церьковасо озновольть эрзякс ды те топавтозель. Эсест ёнкссо пурнась колмо ансамблят, конатне ней теевсть содавикст Самара ёнкссо. Сон вете иеть ашти Самара ёнксонь Борской буень «Мордовская изба» раськень культурань куронь прявтокс. Коллективензэ невтить ёрокчист эрьва кодамо пелькстамосо ды саить васенце таркат. Ансабляс совицятнень марто сон вельмевтинзе кезэрень покшчитнень. Вана уж зярыя иень перть Коноваловка велесэ ютавтови «Вастазь чи» фольклоронь кенярксчись. Икелепелев молиця мелензэ арсеманзо пек ламо. Кемтяно, маласо шкастонть сынь топавтовить!