С 1 сентября во всех школах Саранска будут преподаваться мокшанский и эрзянский языки (мокша)

Ингольдень кизотнень ульсть стама корхнемат, што ётай   аф лама пинге и минь кяленьке   юмай, мокшетне и эрзятне юкстасазь   кит синь,   коста   молихть юроньке, кодапт   койхне-обуцятне. Кие тяфта арсесь, катк сяда товга   арьси. Тевса лисенди – мокшень и эрзянь кяльхненди кельгомась кизоста-кизос касы, сон тонафневи, эсь кяльсонк кайгихть морот   сиде моронят,   латцевихть спектаклят, нолявихть книгат, эфиру   лисендихть   передачат. Кяленьке тонафневи ошень   школатнень эса,   университетса, педагогическяй институтса. Ошень школатнень эса,   кода и веленнеса, эсь   кяльса   урокнень   вятьсазь   машты   специалистт, кинди   минценнесь и мала, и седис. Аньцек тяфта   тевти   нежедезь ламось   ванфтови, и васендакиге, кяльсь, мезсь инь питнись тейнек. А мезе   кальдявоц, кда ряцок эряй ломаттне,   синь идьсна кармайхть содама кяленьконь? Васенце   сентябрьти нинге ули пинге. Сяс тядятненди-алятненди арьсема, кодама кяль кочкамс – эрзянь, мокшень. Минь аньцек азсаськ: кафцьке кяльхне мазыхть и сят, кит ушедыхть тонафнема кяленьконь, тянь квалма аф кармайхть ужяльдема.