Россиянь Президентсь васедсь Мордовиянь Оцюнять мархта (Президент России встретился с Главой Мордовии) МОКША

Пингстонза шарфтфоль мяль инь таколфты кизефкснень лангс. Владимир Волков пачфтезе Президентти республикаса социально-экономическяй ситуациять колга.
Республикань Главась азондозе Владимир Путинонди кода ащихть тефне импортнай товархнень полафтомаснон мархта. Главнай проектсь тячи Мордовияса – васенце заводсь Россияса оптоволокнань тиемать коряс.
Тячиень шить Россиянь кабельнай сембе предприятиятне рамсихть оптическяй мушка омба масторста. Тяни Саранскяень заводсь максы кабельщикненди отечественнай продукция. Видесонза кармай тиевома телекоммуникационнай и техническяй оптическяй сюре, тяконь лувксса нанотехнологиянди, связень кабельхненди, медицинанди, обороннай комплексти, предприятиятненди, конат добувайхть нефть и газ.
Владимир Волков казьсь Президентти минь республикасонк тиф оптоволокна. Васенце ванфста – тя клянцеконь сюре, конанц келец араламань вельхтяфксть мархта 250 микротт. Клянцеконь сюрень фкя километрать сталмоц 30 граммат. Стане жа азома, что заводта башка Саранскяйса Технопаркть видеса тиеви-кочкави волоконнай оптикань Инжиниринговай центра, коса кармайхть тиендевома технологият и приборхт, конатнень юрса ащи оптоволокнась. Лиякс азомс, Саранскяйса тиеви-кочкави афкуксонь кластер волоконнай оптикать коряс. Сонь эвондаманц мархта Россияса ушеды касома-виияма промышленностень од ширесь.