Роштовасо саезь Крещения видьс читне свал ульнесть лия ёнов а молицякс, иневаньксэкс. Кодат койть-кирдат ванстовсть Пакся Тавласо. (ЭРЗЯ)
Роштоваютксто мереви весеменень якамс вейкест вейкест туртов инжекс, кандомс лезэ нужачисэ эрицятненень, весёльгалемс ды калядовамс. Калядамотне те кезэрень пингень кой, сон ульнесь пек вастневицякс кода мокшэрзянь истя и лия раськетнень ютксо. Якшамковонь 6-це чистэ саезь таргонть перть, эрзятне морсесть калядань морот. Якасть кудосто кудос ды калядасть вальма ало. Коень коряс калядамонь читнестэ прявт ярсамопелекс ульнесь ды каднови суронь кашась. Калядамо якасть кода эйкакштнэ, истя покшнтнэяк. Кой-кона велетнесэ прякинень, ламбамо пелень вешнеме совсесть ансяк эйкакшт. Морыцянь ветницясь кудыкелев совамсто панжилинзе весе кенкшнэнь, ёртниль видьметь. Коень коряс инжетне ёвтыльть кудораськетнень паро валт. А ташто Од иень вестэнть ломантне бажасть иень перть таштавозь беряненть пултамс толбандясо. Кудос калядыцятнень а нолдамось лововсь берянь тевекс. Пакся Тавласо неень шкас кемить – кинь кудос совить калядыцят-те иесь кудораськенть туртов карми пек паро.