Республикать столицаса етась пуромкс, конац лемтьфтоль «Масторава» культурно-просветительнай обществать 25 и «Масторава» эпость 20 кизоснонды (В столице республики состоялось заседание, посвященное 25-летию культурно-просветительного общества «Масторава» и 20-летию одноименного эпоса) МОКША

25 кизода тяда инголи колмоце августста сявомок ветецети молемс Мордовияса етафтфоль «Масторава» культурно-просветительнай обществать васенце съездоц. Тя ульсь оцю аськолксокс минь народоньконь культуранц вельмофтемаса.
«Масторава» обществати тядде топодсь 25 кизот, а «Масторава» эпости – 20. Пуромксти кочксевсть ученайхть, мокшень и эрзянь кялень тонафтыхть, писательхть, журналистт.
«Масторава» обществать пуроптоманцты лама вий и эрьгя путсь содаф ученайсь Дмитрий Надькин. Тяса марса пуроптфтольхть мокшень и эрзянь кяльхнень, культурать, эсь прянь ванфтомать инкса пичеди ломаттне.
«Масторавати» сувсихне ерасть, штоба мокшэрзятне лоткальхть тушендомда республикастонк, штоба лядольхть шачема ширесост и корхтамась и сермадомась молель мокшень и эрзянь кяльса, максомс тейст государственнай кялень статус. Кода няфнесы эряфсь, ламось, мезень квалма корхтафоль обществать васенце съездсонза, тячиень шить сувафтф эряфс.
«Масторава» эпосса няфтьф минь народоньконь материальнай и духовнай культурац. Васенцекс сонь кочкаманцты кярьмодсь Григорий Меркушкин и Василий Горбунов. Ся пингонь од ученайхне Алексей Шуляев и Александр Шаронов лездсть тейст тя тевса.
Тячиень шить «Масторавась» — тя аф аньцек общества и эпос. Тя лемть эса каннихть национально-культурнай автономиятне, эрь кодама выставкатне, мокшень и эрзянь национальнай щамонь няфтемань илатне, спектаклятне и лама мезе лия. Тя корхтай сянь квалма, што «Масторавась» мала минь народоньконди, сяс тефне, конат ушетфтольхть и тифтольхть лама кизода инголе мокшень и эрзянь ломаттне кармайхть мяляфтомост фалу.