Республикать столицаса етась мокшэрзянь народть Межрегиональнай общественнай организациянц Исполкомонц заседанияц (В столице республики прошло заседание Исполкома Межрегиональной общественной организации мордовского (мокшанского и эрзянского) народа) МОКША

Мокшэрзянь народть мекольце съездсонза примафоль решения,конанц корява минь народоньконь Межрегиональнай общественнай движенияц тифоль Межрегиональнай общественнай организациякс. Исполкомонь оцюнякс кочкафоль Александр Лузгин, а организациянь вятикс – Юрий Мишанин. Васенце задачакс, кода и ингольдень кизотнень, ащихть тефне национальнай культурать, диаспорать мархта соткснень кемокстамаснон коряс.
Исполкомти сувси 58 ломань. Тя сят,кит прянек-сединек пичедихть национальнай культурать вандыень шинц инкса. Тяфтама пуромксне етафневихть аф аньцек республикать столицаса, но и райоттнень эсовок, диаспораса. И фалу корхтамась мольфтеви инь пичефти кизефкснень колга.
Заседанияса азфоль, мезе удалась тиемс Исполкомти 2015-це кизоня. Республикаса и диаспораса етафтфт круглай шра вакст, васедемат лия аймаконь вяре ащихнень мархта. И сембе вастова ся ушетксне,конатнень мархта нежятькшнесть Исполкомти сувсихне, кирневсть. Кепотьксонди, сай кизоста сявомок Россиянь ламоц аймакнень эса етафтови «Шумбрат» Всероссийскяй фольклорно-этнографическяй илась.
Исполкомть заседаниянц пингста азфоль, што ня шитнень Мордовиянь Оцюнясь кемокстазе указть, конанц корява профессорти, исполкомть ингольдень вятиенцты Михаил Мосинонди максови Республикань Оцюнять премияц, а Мордовияса содаф краеведсь Василий Кирдяшов казьф  «За межнациональное согласие» медальса.