Республиканскяй архивнай службась сувафты эряфс «Фронтовые судьбы уроженцев Мордовии в фотографиях и документах» проектть эса (Республиканская архивная служба реализует проект «Фронтовые судьбы уроженцев Мордовии в фотографиях и документах»)

Тядде топодсь 70 кизот Сяськомань шиста. Тя шити лама вастова етафневсть эрь кодама илат,конатнень пингста лятфневсть сятнень лемсна, кит эряфонь апак ужяльтть тюрсть аеркс фашисттнень каршес. Мордовияста фронту тертьфоль кафта сятт нильгемонь кота тежянь ломань, сяда колмогень тежянць ашесть мрда меки куду. Штоба тячиень поколениясь содаль синь подвигснон колга, республиканскяй архивнай службась панчсь информационнай ресурс, коса кочкафт документтне, конат ванфтовихть Россиянь архифнень эса.
«Фронтовые судьбы уроженцев Мордовии в фотографиях и документах» — тяфта лемтьф сайтсь, конанцты кочкафт документтне минь аймакстонк фронту сявф воиттнень колга.
Мордовияста боецне тюрсть ламоц фронттнень эса: Брестскяй крепостть, Москуть и Ленинградть, Севастопольть, Сталинградть араламста, Курскяй дугаса, Белоруссияса, Украинаса, Европаса и Берлинца.
Электроннай базати путфт боецнень наградной листсна, сермасна, удостоверениясна, красноармейскяй книжкасна и фотографиясна. Кой-кона документтнень архиву максозь боецнень раднясна,кой-кинь квалма сведениятнень мушендсазь архивонь и мемориальнай военнай и трудовой подвигонь музеень покодихне.
Электроннай базась кочкавсь вете киза пингста. И аньцек тядде архивонь покодихне панжезь тя сайтть. Сонь электроннай адресоц – www.sudbasoldata.ru. Сайтть вельде сермадови серма сонь тииензонды, кучевихть эрявикс документтне. Архивонь покодихне эняльдихть республикань сембе эряйхненди: кда семьясонт ули ломань,конац ульсь Великай Отечественнай войнаса, пачфтемс тейст тянь колга.
Тячиень шити базаса 23 367 документ. Синь азондыхть 7 539 войнань участниконь колга. Тинь лезксонтень вельде тя лувкссь касфтови.