Региональнай компонентонь школьнай учебникне апакт сувафтфт Федеральнай лувксти (Школьные учебники регионального компонента не входят в Федеральный перечень учебников) МОКША
Мордовияса сембе школатне аноклайхть од тонафнемань кизоти. Тяфта, республиканскяй бюджетста авозлаф нильгемонь вейкса миллион кафта сятт тежянь цалковай книгань рамамс. Пцтай нильгемонь фкя миллион цалковайть лангс рамаф ни учебниконь сяда вете тежянь экземпляр. Аф сатнихне рамавихть лядыкс пингста. Кда корхтамс Саранск ошть квалма, то тястонь школань тонафнихненди эряви нильгемонь вейкса тежянь од учебник, комсь тежянць эздост ни пачфтьфт школатненди. Кой-кона тонафнемань заведениятнень эса синь явондозь ни иттненди.
Оцю пичефксокс тячиень шить ащи ся, што мокшень и эрзянь кялень учебникне апак сувафтфт тонафтомань литературань Федеральнай лувксти. Васенце сентябрьста сявомок эряфс сувафтовихть ФГОС-нь вешфксне, но мзярс региональнай компонентть вятеманц коряс фкявок учебник апак тик синь коряваст. Кода корхтай Саранск ошень образованиянь управлениять оцюняц Оксана Шуляповась, тя пичефкссь аф аньцек минь республикасонк. Россиянь национальнай сембе аймакне повсть тяфтама прябалас. Мордовияса региональнай компонентонь учебникнень цебярь методическяй ширесна. Но тячиень шить тя книгатне лемнемат аф учебникокс, а учебнай пособиякс. Тага фкя таколфты кизефкссь – улихть ли Москуса РАО-са и РАН-ца специалистт, конатне шарьхкодьсазь мокшень, эрзянь кяльть, содасазь минь народоньконь культуранц, штоба максомс афкуксонь оценка нолдаф учебникненди.
Тя кизефксть лангс оцю мяль шарфтфоль и аф кунара етафтф мокшэрзянь народть межрегиональнай общественнай организациянц исполкомонц пуромкссонза. Образованиянь министрть полафтыец Галина Явкина виденцясь, што тя фкя инь таколфты кизефкссь тячиень шить республиканьконь образованиянь системасонза. Штоба сувафтомс учебниконь фкя линейкать Федеральнай лувксти эряви пандомс 500 тежянь цалковай. Сяда теждя улель, кда тя учебникненди экспертиза тиендельхть синць национальнай республикатне. Азома и ся, што эрявикс экспернай группат улихть эрь аймакса.
РФ-нь образованиянь министрть лемс тя кизефксть колга кучф серма. Кда и мувихть ярмакт учебникнень рецензировандамс тядде, то синь сувафтовихть Федеральнай лувксти аньцек 2018-це кизоня, сяс мес сон одкстопневи весть колма кизоти. Тяда башка, тячиень шити региональнай компонентть тонафнеманц мархта сотф учебникнень аш электроннай приложениясна. Ветеце, котоце, сисемце классонь книгатнень коряс апак тикт программат и методическяй указаният. Кода кармай вятевома мокшень и эрзянь кяльсь школатнень видеса — няфтьсы пингсь. Кенярьфти фкя – кда моли корхтамась тя пичефкснень колга, ули надияма, што тевсь валом-валом шашты фкя вастста.