«Равось-ояксчинь лей» экспедициясь Чувашиясо. (ЭРЗЯ)
Эрзянь-мокшонь раськень васенце инекужонь ютавтомадо мейле, РФ-нь республикатнесэ кармить панжовомо национально-культурной куншкакурот. Васенцетнень ютксо ульнесь Чувашиясь. Республикасонть меельце сёрмадстоманть коряс, эрить малав 20 тёжат финно-уграт. Эрзятнеде, мокшотнеде Чувашиясо 16 тёжат ломанть. Мордовиясто делегациясь Чувашияв сакшны сеедьстэ. Кавто республикатнень ютксо умок ладязь ояксчисэ эрямось. Истя ульнесь неть читнестэяк. Чувашиянь Раськень музейсэнть Мордовиясто инжетнень вастызе культурань, раськень ды архивень тевтнень министрань васенце полавтыцясь Иван Архипов. Сон тешкстызе, што пингень перть ветькетне эрить ояксчисэ лия раськетнень марто. 25 иеде теде икеле республикасост панжови «Мордовский культурный центр» общественной вейсэндявксось, конань прявтокс ней ашти Владимир Седойкин. Мезесь пек талновты вейсэндявксонь прявтонть – те эрзянь келенть тонавтомась. Сон тонавтови раськень весе школатнесэ, ансяк эряволь бу тень ушодомс эйкакшонь кужотнестэ саезь.
Весе сеть мельтне-арсематне, конат молить культурань куншкакуронь прявтонть, активенть пельде, Чувашиясо кирдевить ды совавтовить эрямос. «Равось – ояксчинь лей» экспедициясонть ульнесь Чувашиянь Алтышевань школань эрзянь келень тонавтыцясь Ирина Долгова. 17 иень перть сон топавты те тевенть. Кода свалгак ушодомс ульнесь пек стака, арасельть тонавтома пелькст, эрявикс материал. Ней ламо лездыть национальной журналтнэ, газетатне. Покш лезэ максови Мордовиянть пельде. Национальной школатнеде Чувашиясо ниле: колмо Порецкой буесэ, вейке Алатырской. Теде башка республикасост свалшкане ютавтовить «Арта» раськеютконь фестивалесь ды буень «Чипайне» эйкакшонь шкинемань покшчись.