Раськень налксематнеде кортазель исполкомонь президиумонь промкссо. (ЭРЗЯ)
«Эрзянь-мокшонь раськень налксематне ды пелькстамотне кода ламо раськень масторонок коень питнечинь ванстомань форма»! Истя лем ало Мордовиянь прявтошсо ютась эрзя- мокшонь раськень регионъютконь общественной вейсэндявксонь исполкомонь президиумонь промкс. Ней «Тюштянь налксемтне» – фольклоронь покшчинь программань свалшкань аявовикс пелькс. Ламо раськень эйкакштнэ покш мельсэ содавтовить эрзянь, мокшонь кезэрень койтнень марто, виевгавтыть тиринь масторонтень вечкемаст, кемекстыть шумбрачист, ёрокчист вишка пингстэ саезь. Эрзя- мокшонь раськень регионъютконь общественной вейсэндявксонь исполкомонь президиумонь промксонь истямо мельстуиця ушодксось макссь седеяк ламо мельть седе домкасто ванкшномс вастовоманть ютавтомань прявтлувс аравтозь кевкстеманть. Кочказельгак сон а стяко. Кирдезель, эрзянь, мокшонь налксематне- кода региононок туризмань невтемань башка элемент!Теке марто пурнавозтне прасть ве мельс- совавтомс раськень налксематнень тонавтомань учреждениятнень программас. Ансяк кода теемс видестэ, лезкс ды паро цетавкс марто? Тень коряс евтазельть зярыя арсемат. Валентина Щанкина ёвтась мель раськень налксематнень кирдемга, седе виевстэ эрямос совавтомга- ушодомс ютавтомо эйкакштнэнь, од ломантнень ютксо пелькстамотнень прявошонь куротнень дворовой площадкатнесэ. Тагояк тень пингстэ кирдема мельсэ, эрьва – косо улезт истят таркат. Кортамосонть явовсь мель сененьгак- улезт седе ламо эсь тевень содыця тренерт. Эрзянь, мокшонь эйкакшонь ды од ломанень налксематнеде домка ды сюпав информация муеви Василий Брыжинскиень одс нолдазь книгасо, конантень максозь покш питне ловныцятнень пельде. «Акша келу» покшчинь раськень тюремань коряс 19-ксть чемпионось Николай Ершов тешкстась, неень шкане прявтокс ловови ванстомс раськенек налксемань , тюремань кезэрень койтнень! Промксонь еще вейке прявт яволявтомась – Мордовиянь прявтошсо «Шумбрат» Весероссиянь покшчинть умарьковсто ютавтомадо.