Прядовсь «Западный фронт-3» регионъютконь вешнемань экспедициясь. (ЭРЗЯ)
Калуга ёнксонь Барятинской райононь Зайцева Гора веленть вакссо прядовсь «Западный фронт-3» регионъютконь вешнемань экспедициясь. Вейс пурнавкшность 200 поисковикть Россиянь эрьва кодамо регионсто ды маластонь омбо масторсто. Мордовиясто якасть 12 ломнать «Поиск» республикань патриотической вейсэндявксонь прявтонть Николай Кручинкинэнь марто. Те иестэнть поисковиктне поладызь 2014-15 иетнестэ ушодозь роботанть. Кавто иень перть муезельть ды калмазельть 200 солдатт. Эрьва кодамо даннойтнень коряс Зайцева Горанть кисэ тюремасонть маштовсть 70 тёжасто 200 тёжас советской воинт. Маштовозтнень ютксо аволь аламо Мордовиясто солдат. Те иень вешнемань роботатнень лувсо муезь 158 боецт, муезь 3 медальонт. «Поискень» боецтнэ экспедициянь ютавтома шкастонть мусть 21 солдат. Медьковонь 13-це чистэ, лагерень пекстамонь рамкатнесэ воинской почесть марто калмазельть весе муезетне.