Полициянь патрульно-постовой службасо важодицятне тешкстызь профессиональной покшчист. (ЭРЗЯ)
РФ-нь полициянь патрульно-постовой службань чись тешкстави таштамковонь 2-це чистэ. Самай те чистэ 1923-це иестэ НКВД-нь Центральной административной управлениясь 4-це номер приказонть ало кемекстызе «Постовой милиционерэнтень инструкциянть».
Патрульно-постовой службась – Россиянь полициянь пелькс, сонзэ важодицятне ванстыть минек сэтьмечинек, сынь васенцеть сетнень ютксо, кить вастовить закононь колыцятнень марто ды путыть весе виест сынст кундамонтень. Службась аволь шождатнень эйстэ, сонзэ важодицятненьтеме а юты вейкеяк покшчи, концерт, матч. 25 иеде ламо неть кавто ломантне важодить вейсэ. Ней уш теевсть паро ялгакс, конат, бути те эряви, максыть вейкест-вейкест туртов лезэ. Эрьва важодема чись канды мезе бути од.
Николай Кемаев патрульно-постовой службасо важоди малав 30 иеть! Армиядо мейле, а служась сон Афганистансо, сась ды, кода мерить, пезнась те важодемас. Зяро ломанть, ансяк сыцят ютасть кедензэ пач, сонськак а соды. Пейдезь корты, эйстэдест пурнавить «кавто полкт». Армиясо улемстэ тиринь масторонтень долгонь пандоманть кисэ казезь Отвагань медальсэ. Важодеманть перть зярыяксть ульнесь «пси точкатнесэ», косто лиясто кудов велявтыть аволь весе. Сынст лемест кундазь, ялгатне ледстнесызь вейсэнь важодеманть. Ютазь пингень 90-це иетне ульнесть пек стакат патрульно-постовой службасо важодицятнень туртов. Шканть молеманзо марто полавтови оснащениясь, лезды важодемасо неень шкань од оборудованиясь.
Эрьва важодеманть ушодовомсто васняяк эрявить лездыцят. Ды седеяк пек сынь эрявить те важодемасонть. Николай Васильевич вадря тонавтыця. Соды кода кортамс ушодыцянть марто, мейсэ лездамс тензэ васенце ковтнестэ. Те аволь шожда тевсэнть кадовить ансяк кеме обуця мартотне.
Патрульно-постовой службань покшчинь тешкстамсто сех вадря важодицятне казезельть шнамонь конёвсо ды казнесэ. Кадык сынст туртов эрьва важодема чись юты шождасто.