Поладови «Мордовия мастеровая проектэсь» (ЭРЗЯ)
А.Пушкин лемсэ национальной библиотекасо «Мордовия мастеровая» проектэнть рамкатнесэ эрзя-мокшонь раськень регионъютконь вейсэндявксось ютавтсь «Тавлань налшкесь – раськень ерокчи» кенярксчи. Течи Тавлань чувто ланга керсицятнень теевксэст ванстовить Россиянь ды мик Европань музейтнесэ. Ушодовсь жо весемесь ютазь пингень 70-це иетнестэ. Сестэ ероков од ломантнень вейс пурнынзе Николай Мастин. Пель пингеде ламо Тавлань мастертнэ – минек региононь каштанчинек, а чувтонь налшкесь теевсь Мордовиянь тешксэкс. Нейгак важодемась а лепами, улить паро тевень поладыцят. Пушкин лемсэ библиотекасонть пурназель чувтонь налшкень невтема, косо теевксэст невтизь Тавлань эйкакшонь экспериментальной школань неень ды умонь трявкстнэ. 2018-це иентень, футболонь коряс Масторлангонь Чемпионатонь ютавтома шкантень, Вирь ало Тавласо арсеви панжомс этнографиянь парк, конась содавтсынзе омбо масторсто туристнэнь эрзянь велень койтнень ды эрямонь лувонть марто.