Петрувонь постсь. (МОКША)
Православнай христиаттнень эряфса ниле оцю кувака постт: Рождественскяйсь, Очижида инголе Великай постсь, Тройцяда меле Петрувонь и Успенскяйсь. Кажнайть эздост сонцень аф эсь лацонь ширенза. Кепотьксонди, тяддень Петрунь постсь сяда нюрьхкяня. Феодор Санаксарскяень лемса Шкаень кудса Георгий батюшкась покоди вов ни кеветие киза. Пингта ётась аф сяшкава лама, мзярда панчфоль тя церькавсь. Мазолгофтомац и петемац моли тяниемс. Лездыхть ломаттне, конат сашендыхть озондома. Аф стак вдь корхнихть, што кржа атказамс ярхцамбяльть эзда эряви и цебярь тевсовок няфтемс пряцень. Эрь ломанть сонцень Шкайти киц. Кие-бди ёмластокиге венеми церькавти, кие сашенды верондамати кизонь ётазь. И вов постть кирдемац, каендамась и озондомась — аруяфтсазь ломанть ваймонц, лезды эрямс и арамс сяда малакс Шкайти.