Пензенскяй аймакса етасть Россиянь Кубкань пялькстомат емла самолёттнень ёткса, конатнень азорсна вятнесазь радиопульттнень вельде (В Пензенской области прошёл этап Кубка России по пилотажным радиоуправляемым моделям самолётов) МОКША
Пензенскяй аймаконь Оцю Вьяс велеть ваксс, «Радуга» спортивно-техническяй комплексу, пуромкшнесть инь маштыхне ёмла самолетонь кочкамаса и сят, кит аньцек ушеткшнихть тя пара тевть эса. Кочкавсть синь Россиянь ламоц ошнень эзда. Ужяленди, Мордовияста кивок ашель. И спортонь тя видсь мзярс минь аймаксонк ефси аф содаф. А пароль шарфтомс мяль лангозонза. Улихть ломатть, конат путнесазь эсь вийснон и карьхцяйхть аф кржа ярмак тянди, но лездыхть сяда тов аш. «Радуга» спортивно-техническяй комплексса, кона ащи Пензань модать лангса, минь республикань пара ломаненьке строясть эсь ярмакснон лангс пяк цебярь площадка, коста тушендыхть лиема менельти эсь кядьса тиф емла самолеттне, етафневихть тяса эрь кодама пялькстомат. И цебярь улель, кда эйсь тостядеволь вастстонза — авиамодельнай спортсь минь республикасонк кочкаль вийхть. Кда еткшиста аф ламода шорясь пиземсь, то недляшиста ушеса ульсь мани и спортсметтне пара мяльса лийфнезь эсь самолетснон, конатнень мельге ванцть пуромф ломаттне — сят, кит шарьхкодихть авиамоделизмать эса и Россиянь кубкань судьятне.
Ламоц самолеттнень пялькстомань участникне кочказь синць. Тонадсть тянди идькс пингстокиге, а сяда тов тя тевсь синь эряфсост арась инь кельговиксокс. Васенцеда ванозь, сон пяк теждя, люпшнить пультса пунянятнень и сембе — самолетсь врьгяти вяри или валги алу, тиендемок эрь кодама шаркст. Но самолетсь васьфни эсь кисонза кожфонь перяфкст и пяк маштома вятнемонза сонь. Правилань коряс эрявихть няфнемс аф фкя лацонь фигурат, шарондомат. И кода любой техникать эса, улендихть синневомат, конатнень петнесазь синць азорхне.
Спортсметтне няфнезь эсь маштомашиснон колма категориява: «Любитель», «Мастер» и «Профи». Кажнайсь сатсь эсь тевсонза сонцень текшензон. Нижняй Новгородста Алексей Горбунов маштсыне пилотажень сембе виттнень и тяда башка, лийфнесы эсь самолетонц музыкань коряс, кода конькаса фигурнайста курькснемаса. Пилотсь арьсекшни эстейнза эсь лацонь программа, конань коряс самолетсь кулхцонды эсь азоронц эса. Авиамодельнай спортсь лувондовсь аньцек аляннекс, коса маштома самолетть вятнема и синнеф детальхнень петнема, но Йошкар-Оласта авась — Людмила Маклагина аф максси пря тя тевса алятнендиге.
Пялькстоматне аделавсть, эрь категорияса азфт сяськихне, конат казьфт медальса, кубкаса и питни казнеса.