Отяжбуень культурань ды ремёслань куронтень кавто иенть. ( Атяшевскому центру национальной культуры и ремёсел 2 года) ЭРЗЯ
Самай тесэ ванстовить раськень койтне-кирдатне. Кавто иень перть куросонть ульнесть ютавтозь ламо вастовомат, мелень саиця мероприятият. Раськень культурань ды ремёслань курось дивавты ламонь эсензэ мазычисэнть. Сон теевсь Атяшевань алкуксонь достопримечательностекс. Зданиясонть колмо этажт. Васенцесэнть 457 таркас покш зал, конасонть свал ютавтовить концертт кода инжетнень истя и Атяшевань райононь эрицятнень туртов. Омбоце этажсонть киштемань ды морамонь залт, зярыя кабинетт, конатнесэ ютавтовить эйкакштнэнь туртов артомо, чувтосто керсеме ды викшнеме тонавтомань кружоктнэ. Колмоце этажсонть кабинетнэде башка тарканзо муизе этнографиянь музеесь, конасонть пурназь ламо экспонат. Сынь алкукс дивавтыть сельме, сеедьстэ экскурсияв сакшныть эйкактш. Теке этажсонть пурназь картинань ды фотографиянь галерея. Куронть лувсо важодить зярыя творческой коллективть: Атяшевань райононь сводной хорось, эйкакшонь ды фольклорной хортнэ, пурназь театральной студия, ули киштемань вадря коллектив. Покш мельспаросо эрьва мероприятиясо ёрокчинзэ невти Атяшевань райононь духовой оркестрась. Тешкстама, весе тесэ теезь од технологиятнень ды вешематнень коряс, ансяк тень лангс апак вано куронь прявттнэ ды Атяшевань администрациянть икеле аштить и лия бажамоткак. Нама, течи покш тарка минек эрямосонть саить компьютертнэ, телевидениясь ды интернетэсь. Ансяк, кода минь неинек эсь сельмсэнэк, Атяшевань районсо эйкакштнэ, од ломантне покш мель путыть и лия тевтнененьгак. Тесэ а стувтнить келенть, раськень искуссванть, моротнень, киштематнень. Покш лезэ теньсэ максы Раськень культурань ды ремёслань курось. Те пек паро площадка, косо ванстовить ды вельмевтевить минек раськенть койтне-кирдатне.