«Од толонь чись» Сызраньсэ (ЭРЗЯ)
Од толонь муема, толбандянь кирвазтема, тунда кудоракшань кардазсто васенце ливтемга озкс! Истямо лувсо эрзятне бажасть ванстомс ракшаст весемеде апародо. Кезэрень шкань коесь неень вановтсо кода раськенек культурань фестиваль ютась Самара ёнкссо. Кенярксонь кандыця моросо ды нурька моросо васты регионъютконь фестивалень инжетнень «Нармунь морыця» фольклоронь ансамблясь. Эрзя-мокшонь покшчись кармась улеме Сызранень культурань ковкерьксэнь аявовиця пельксэкс. Коень коряс, фестивальс пурнавшныть Мордовиясто, Самара, Ульяновск, Пенза ёнкстнэстэ артистт. Штатолонь кирвазтемасто коень коряс ушоды покшчинть эрзя-мокшонь раськень культурань Автономиянь прявтось. Иван Кистанов тешксты, тиринь культурась эряви вечкемс ды ванстомс! Самара ёнкссо ояксчисэ эрить 157 раськень представительть. Регионсонть – эрзя-мокшонь 15 общественной вейсэндявкст, нолдави «Од вий» кулялопа, ютавтовить фестивальть, воскресной школатнесэ тонавтневить тиринь кельтне. Раськетнень ютксо вейсэнь важодемантень явови покш мель. Маласо шкасто Сызраньсэ учови Ояксчинь кудонь панжома. Пурнавозтнень туртов ёрокчист невтсть ламо коллективть. Эрзянь, мокшонь, рузонь кельсэ моротне киньгак эзизь кадо мельтеме. Виев цяпамосо фестивалев сыцятне вастызь Мордовиянь заслуженной артисткатнень Анна Атласовань ды Любовь Князьковань. Башка казне-«Морденс» национальной оркестранть пельде. Раськень коень, культурань ванстоманть, патриотической воспитаниянь ды региононь туристической потенциалонь кастоманть-кепетеманть кис эрзя-мокшонь раськень движениянь активистнэнень максозельть покш казнеть. «За межнациональное согласие» Мордовиянь культурань ды раськень политикань министерствань медальсэ казезь Сызранень мэрэсь Николай Лядин.