Нолдафт поэтическяй и музыкальнай произведениянь пусмот, конат лемтьфт Саранскяйти (Изданы сборники поэтических и музыкальных произведений, посвященных Саранску) МОКША
Саранск ошсь сатомкша сире. Эряфкшу ломаттне мяляфтсазь сонь ингольдень рдазу ульцянзон, аф сери куттнень, ялга якама кинятне ульсть ацафт доскаса. Тячиень шити ошсь пяк полафтозе шамаликонц. Кода ни азоськ, лемтьфт тейнза стихт, морот, но башка сборник нинге апак нолдаколь. Сяс оцю вий и смузь путсть республикаса содаф ломаттне. Кочкайкс марстонь сборникти арасть поэтсь Александр Любимов, «Союз Сураевых-Королевых» фондть оцюняц Светлана Сураева-Королева. Редакторкс арась содаф учёнайсь, историческяй наукань докторсь, поэтсь Николай Мокшин, музыкальнай редакторсь Николай Митин и техническяй редакторсь, композиторсь Вячеслав Кисляков. Эряви азомс, Светлана Георгиевна Сураева-Королева, тяда башка, лама покоди эсь алянц, содаф композиторть Россиянь и Мордовиянь искусствань Заслуженнай деятельть Георгий Иванович Сураев-Королёвонь сёрматф произведениянзон нолямаса. Тя моронь сборникть мархта марса лиссь и содаф композиторть струннай квартетонза. Тяда инголе нолдафоль «Мон кельгса Саранскяйть» пусмось. Оцю лезкс ня изданиятнень нолдамаса макссть ошень администрациянь кафта оцюнятне — ингольденнесь – Владимир Сушков и тяниеннесь – Петр Тултаев. Ня колма сборникне мусазь эсь вастснон эрь библиотекаса, и кондястихть кода профессиональнай, а стане самодеятельнай композиторхненди и моронь морсихненди.