Нижегородской ёнксонь Лукояновань буесэ ютась «Эрзянь лисьмапря» регионъютконь 7-це фестивалесь. (ЭРЗЯ)
Кенярдовтыця мазый моросо весень вастыть Пенза ёнкссто ды Мордовиясто фольклоронь коллективтне. Сыцятнень туртов анокстазь тантей ярсамо. Тесэнь аватне толбандя лангсо пидесть сывель ям ды анокстасть лия ёнов а молиця чай, конасонть шукшторовонь, инзеень ды лия тикшень лопат. Симемапелесь лезды витемс шумбрачинть! Паксясо аштиця этнопарксонть, кона аволь умок совавтозель весероссиянь этнопарктнень юткс, пурнавсть малав 2000 ломанть. Раськень штатолонь кирвазтема ды Инешкипазонтень ознома – фестивалень сехте прявт пелькстнэ. Озномадо мейле весе кундыть кедте кедьс ды теить покш кирькс, кона невти раськетнень вейсэндямост ды ялгаксчист. Эрьва иестэ «Эрзянь лисьмапрянь» теицятне бажить кенярдовтомс весе сыцятнень. Те иестэ истямо кенярксокс ашти «Россиянь цёковт» кеврунгонь панжомась. Сонзэ анокстызе керсицясь Николай Аношкин. «Россиянь цёковт» кеврунгонь панжомась – те ине лецтнема Лидия Руслановадо, Илларион Яушевде ды Алексей Лесныхте – Олёшто. «Россиянь цёковтнень» морост гайгить казнекс весенень, кить састь покшчинтень. Николай Атаев шабра буень эрзянь цёрась фестивалентень сакшны эрьва иестэ. Сон кенярды, зярдо васты содавикс ломань, неи васолдонь инже ды мари эрзянь кель. Валонзо коряс, эрзянь келесь тесэнь школатнесэ а тонавтневи, мезесь вети сонзэ ёмамонтень. Секскак фестивалесь лезды а стувтомс тиринь келенть. Фестивальсэ гайгсть морот эрзянь, мокшонь, рузонь, чувашонь ды маринь кельтнесэ. Ёжонь кепетемантень лездасть тиринь кельсэ кортамотне, киштематне ды пси пертьпельксэсь. Тесэнь лисьмапрясь явавтсь весе ютыцятнень симемаст кельме ведьсэ. Сы иестэ фестиваленть арсить ютавтомс седеяк келейстэ.