Неть читнестэ РФ-нь Общественной палатасонть ютавтовсь видеоконференция, конань лувсо ёвтавсть Межэтнической журналистикань школань важодемань цетамотне. (ЭРЗЯ)
Кортамось ветявсь «Гражданское общество и гармонизация межэтнических отношений через призму СМИ» кевкстеманть коряс. Вастовоманть панжизе РФ-нь Общественной палатас совицясь, Межрелигиозной ды межнациональной отношениянь гармонизациянь коряс комиссиянь прявтось Илья Дискин. Видеоконференциясонть примасть участия масторонь 15 регионтнэ. Мордовиянть невтизь Межэтнической журналистикань Гильдиянь Саранскоень отделениянь прявтось, Меж-этнической журналистикань курсатнень ветицясь, «Эрзянь правда» газетань прявт редакторось Николай Петрушкин ды МР-нь Общественной палатань сопредседателесь, культурань, межнациональной ды межконфессиональной отношениятнень гармонизациянь коряс комиссиянь прявтось Валерий Юрчёнков. Межэтнической журналистикань школатне важодсть Россиянь 18 регионтнэсэ даволковсто саезь панжиковс. Тедеде вейсэнь программанть коряс тонавтнесть масторонь 251 од журналист. Курсатнень анокстыцясь ды ютавтыцясь – Межэтнической журналистикань Гильдиясь, тонавтомась ветявсь РФ-нь Президентэнь грантонть вельде.
Межнациональной кевкстематнеде кортамсто, пурнавозетне тешкстызь, лиясто СМИ-тне сынсь пштилгавтыть раськетнень ютксо ачарькодематнень ды аладямотнень. Те тееви сень пингстэ, зярдо кулясь максови вейке ёндо ды аволь видестэ. Витемс те стакачинть лездыть журналистэнь вейсэндявкстнэ. Видеоконференциянь ютавтомань шкастонть региононь школатнень ветицятне ды тонавтницятне ёвтызь мелест курсатнень коряс, макснесть талновтыця кевкстемат Общественной палатань важодицятненень. Од журналисттнэ явсть мель раськень журналистикасонть пшти кевкстематненень, этнотуризманть виевгавтомантень, раськень кельсэ лисниця газетатнень ды журналтнэнь, радио- ды телепередачатнень вандынь чидест Мордовиянть пельде кортамсто Николай Петрушкин тешкстызе, республикань раськень журналистикасонть важодицятне, раськень политиканть топавтыцятне кирдить кеме сюлмот МР-нь Общественной палатанть марто. Покш лезкс те кевкстемасонть яви Валерий Юрчёнков. Сонзэ лезксэнзэ вельде анокстазь раськень политиканть токиця прявт документтнэ. Валерий Юрчёнков тешкстызе, Мордовиясо покш мель явови ламо раськетнень ютксо ояксчинь сюлмотнень кемекстамонтень, сынст ютксо аладямотнень а нолдамонтень. Теньсэ, нама, лездыть СМИ-тнеяк, башка тарка саить раськень кельсэ лисниця радио- ды телепередачатне, газетатне ды журналтнэ. Эряви ёвтамс, Мордовиясо вейкень-вейкень чарькодемасо эрить 119 раськеть. Неть раськень ломантне покш мельсэ ванстыть ды сюпалгавтыть эсест коест-кирдаст, покш мель явить шабрансетнененьгак. Республикасонть покш важодема ветяви тиринь кельтнень, культуратнень ванстомга ды виевгавтомга.