«Не забывай незабываемое» спектакльть няезь диаспораса (Спектакль «Не забывай незабываемое» увидели в диаспоре) МОКША
Мокшэрзянь национальнай театрась няфнесыне од и уликс постановкатнень, конат путневихть кода минцень автороньконь, а стане жа рузонь и финно-угорскяй драматуркнень пьесаснон лангс. И лисендихть синь мархтост ся васттненди, коса эряйхть мокшэрзятне. Аф кунара мрдасть гастрольста Самарскяй аймакста. Тоса няфтезь «Не забывай незабываемое» военнай тема лангс спектакльть, кона путф фронтста и фронту серматнень коряс. Тяда меле сонь няфтезь эсь сценасост иттненди. Жанрас коре тя аф пьеса, тяса аш главнай геройхть и аш азондома, конанди минь тонадоме, кона вятеви сюжетть вельде. Спектакльсь путф военнай серматнень коряс, конатнень лангса оцю тев тись соавторсь Екатерина Исайчева. Сон ламос ащекшнесь архифнень эса, вешендсь минь земляконьконь сермаснон, конат кучфтольхть фронтста. Кода мярьгсь сонць: «Мялень салай историяда пяк лама, но эрявсь кочкамс ёткстост инь няевикс ломанень судьбат, конатнень колга кржа арьсекшневи». Серматнень вельде авторхне ерасть кода сяда видеста и педа-пес няфтемс ся атмосферать, кона ульсь фронтса, коса вятсть кяжи тюрема минь солдатоньке фашисттнень каршес. Режиссёрсь спектакльти Игорь Кузьмин. И пяк пара, што сон няфтевсь школань тонафнихненди. Тяфтама произведениятнень вельде синь тонафтовихть патриотизмати.
Фронтса ульсь сембось: и ляцендемат, и шавондомат, и сельмоветть. А ульсть стама етка пинкт, мзярда солдаттне кеняртькшнесть, мзярда сашендсть серматнень вельде мала ломаньцнон эзда цебярь кулят. Сценать лангса актерхне маштсть няфтемс весялашить, кельгомать. Рахсесть-тисть. Тянь семботь няезь и кулезь емла ваныхне. Бта синць ульсть участникокс тя событиятненди. Аф ваномок войнань шавондоматнень, сембе стакатнень лангс, актерхнень пцтай эрь валсост, эрь спектаклянь пакшкаса кулевсь и марявсь надиямась сяськомать лангс.