Национальной культурань институтсо тонавтыть мазычинть невтеме коцт лангсо. (В институте национальной культуры учат изображать красоту на ткани) ЭРЗЯ

Эрзя-мокшонь традиционной культурань ды неень шкань искусствань кафедрасо важодицятне тонавтыть ламо дисциплинань коряс. Минек съёмочной группась ульнесь художественной текстилень занятиясо. Эсь сельмсэ неинек, кодамо мазычи тонавтыть теме те институтсо. Людмила Левинань художницанть лавтовонзо удало зярыя покш выставкт. Сонзэ батик коряс роботанзо зярыяксть казезельть дипломсо. Сень лангс апак вано, што роботань анокстамос сави ютавтомс ламо шка, художницась а лоткси, свал роботы, вешни искусствасо од кить. Батик техникась аволь шожда. Сонзэ теемас эряви аволь ансяк ламо шка, но и маштомачи. А те техникасо мирэнь художниктне роботыть малав эрьва мастортнэсэ. Саемга Иранонь, Индонезиянь, Прибалтикань, Украинань ды лия мастортнэсэ тень коряс художниктне пек виевть. Сонськак Людмила Демьяновна тешкстызе кода стака роботамс батикенть марто. Ульнесь художницась Весе Россиянь триенналесэ. Эсь сельмсэ неизе, кода бойкасто эскели масторганть искусствань од видэсь. Появить од техникат, од суреть. Но аволь весе домкасто чарькодьсызь этнофутуризманть. Теке марто, кода карминек содамо, Мордовиянь художниктне седе сеедьстэ кармасть тееме эсест роботаст те видсэнть. Лиякс меремс шкась а ашти вейке таркасо. Искусствасояк весе моли икелев, полавтови, лиякстоми. Искусствань вейке видэсь полавтови лиясо, шкань ютазь стувтозесь карми одокс ды истя седе тов.