МР-нь А. С. Пушкин лемсэ раськень ловнома кудось ды государственной филармониясь кармасть «Пушкинэнь карта. Премия» пелькстамонь лауреатокс (эрзя)
Россиянь Покш театрань Бетховенской залсо ютась “Пушкинэнь карта. Премия». Лауреатокс кармасть культурань учреждениятне ды регионтнэ, конат сехте покш путовкс тейсть 2024 иестэ «Пушкинская карта» программанть виевгавтомасо.
Изницятнень кочкасть 20 номинациятнева, сынст ютксо: театрат, концертэнь площадкат, музейть, ловнома кудот, тонавтомань организацият, культурань кудот, кинонь невтемань организацият, истя жо регионт, конат сехте парсте топавтыть программанть.
Мордовия республикань А.С. Пушкинэнь лемсэ раськень ловнома кудось ды Мордовиянь государственной филармониясь – Республикань культурань кудось совасть премиянь лауреаттнэнь юткс.
Пушкин лемсэловнома кудось Россиясо региононь казезь ловнома кудотнестэ вейкине. Сондензэ башка казнеть максозельть федеральной покш библиотекатненень – московонь содавикс «Ленинкась» ды «Иностранкась».
Мордовиянь филармониясь «Лучшая региональная концертная площадка» номинациясонть ловозь сехте вадрятнестэ вейкекс.
Ледстясынек, «Пушкинэнь карта» программась Россиянь Президентэнть Владимир Путинэнь мелензэ коряс нолдазель 2021-це иень таштамковсто. «Пушкинэнь картась» максови 14 иестэ саезь 22 иес од ломантненень. Картас эрьва ие путовить 5 тёжат целковойть, конатнень мереви ютавтомс театратнес, музейтнес, концертэнь залтнэс, кинос ды культурань лия учреждениятнес билеттнэнь лангс. 2025-це иестэ саезь программась совась «Кудораське» раськень теварсевксэс.