Москунь и Сембе Русень Патриархсь Кирилл светязе Кирилл и Мефодий равноапостольнай святойхнень лемса храмть (Патриарх Московский и Всея Руси Кирилл освятил храм в честь святых равноапостольных Кирилла и Мефодия) МОКША
Рузонь православнай церькавонь Оцюнясь сась республикав недляшиста рана шобдава и видеста тусь Кирилл и Мефодий равноапостольнай святойхнень лемса храмти. Тоса эсонза учсть 30-нь тежянть малава Шкайти кемай ломаньда марнек республикаста.
Тя храмть панжемац – оцю ила аф аньцек минь республиканьконди, но и марнек Приволжскяй федеральнай аймакти. Сяс тя шиня Саранскяи сась ПФО-са Президентть полномочнай представителенц полафтыец Олег Мельниченко. Поздравительнай телеграммат Мордовиянь эряйхнень лемс кучсть Россиянь ламоц аймаконь оцюнятне, синь лувкссост и Самарскяй областень губернаторсь Николай Меркушкин. Колма кизода инголе Москунь и Сембе Русень Патриархсь светязе путомань кевть храмть юрхтоза и етафтозе тяса божественнай васенце литургиять.
Соборсь строяф пяк нюрьхкяня пингста – колма кизоста. Владимир Волков азозе, што тя тевти оцю путфкс тисть Мордовиянь сембе эряйхне.
Символическяй панжемать Кирилл и Мефодий равноапостольнай святойхнень лемса храмть эзда региононь Оцюнясь максозе Саранскяень и Мордовиянь Митрополитти Зиновиенди.
Храмть келец колмогемонь, серец – ведьгемонь колма метрат. Службать пингста тяза тяльги кафкса сядть малава Шкайти кемай ломаньда. Инь цебярь вастса храмса кармай ащема Патриархть казнец – Петр апостолть ликоц.
Службада меле Патриархсь казезень грамотаса сятнень, кие строясь Соборть эса.
Храмсь лемтьф Кирилл и Мефодий святойхнень лемса. Кефкие пяле мархта векта тяда инголе синь арьсезь славянскяй азбукать. Соборть эзда аф ичкозе путф памятник христианскяй проповедникненди.
Храмть и памятникть светямдост меле Саранскяень епархиальнай управленияса Патриархсь васедсь Владимир Волковонь и Саранскяень и Мордовиянь митрополитть Зиновиень мархта. Республикань Оцюнясь сюконясь Рузонь православнай церькать Оцюнянцты саманц и марстонь тефнень инкса.
Патриархсь виденцясь, што максы оцю оценка мокшэрзянь модать лангса церькавть и государствать еткса цебярь сотксть кирдеманкса. Сон арьсесь Мордовиянь Оцюняти и республикань сембе эряйхненди духовнай и материальнай ширде и сяда товонь касома.