Московсо нолдызь «Россиясо эриця раськетнень неень шкань поэзиянь антологиянть». (ЭРЗЯ)
Совасть тозонь 57 кельсэ сёрмадозь 229 поэтэнь валморост. Мордовиянь 10 сёрмадыцятнень стихест муизь эсест таркаст антологиясонть! Книгас совавтозельть 751 произведеният. Роботасть сонзэ лангсо 800 ломанть, 142 сынст эйстэ – те ютавтыцят. Васенце томсонть невтевить произведениятнень оригиналтнэ ды ютавтовкстнэ, конат сёрмадозельть меельце 25 иетнень перть. Текстнэнь эйстэ ламотне рузонь кельс ютавтозельть васенцеде ды ансяк те антологиянть кисэ. Книгас совасть эрьва литературной кельденть очеркть ды автортнэде нурька библиографической справкат. Мордовиясто антологияс совавтозельть кемень сермадыцянь произведеният. Антологиянтень икельце валонть сёрмадызе Владимир Путин. Сон тешксты, Россиясо аволь аламо тиринь кельсэ ёроков сёрмадыцят. Секскак эряви путомс весе вийтнень, штобу сынст сёрмадокстост содавольть лиятнеяк. Людмила Рябова кармась Мордовиянь сёрмадыцятнень эйстэ вейкекс, кинь валморонзо совавтозельть антологияс. Эрзянь кельстэ рузонсес валморотнень ютавтызь сынсь сёрмадыцятне. Покш путовксозо теньсэ Татьяна Мокшановань. Меельце шкасто сонзэ ютавтовкстнэ пек вечкевсть кода морыцятнень, истя и стихень вечкицятнень туртов. Сёрмадыцянть Алина Подгорновань шкинемазо содавикс ламонень. Лемезэ минек литературасо редявикс. Валморонзо истяжо совавтозельть антологияс. Маласо шкасто арсеви нолдамс прозань ды эйкакшонь литературань антологият. Теде башка ёвтазель мель нолдамс пусмо драматургиянь коряс.