Мордовияв сась гриппесь! (ЭРЗЯ)
Мордовиясо улить грипп ормасо васенце сэредицят. Кавто таргонь перть республикасонть тешкстазь ормалгадозь 27 ломанть. Региононь 3 школасо кото класст пекстазь карантинс. Сэредемась текшос зярс эзь пачкоде. Но уш течи специалисттнэ тешкстыть, што сех активноекс ули гонконгонь гриппесь эли H3N2. Медиктне содыть, кода лецямс те гриппенть, но ледстить – эстеть прянть лецямс а эряви. Уш течи гонконгонь гриппесь юты республикань эрицятнень ланга. H3N2 гриппень яволявтозь 27 ормалгадозтнень эйстэ сон кемекстазь 16 ломанень. Весе ормалгадозтне прививкат эзть путовтокшно. Тонавтомань процессэсь лоткавтозь Саранск ошонь 24-це школань 1 классо, 26-цень – колмосо ды Ковылкинань райононь школань 2 классо. Специалиттнэ кемевтить, истямо каникуласо эйкакштнэ кармить 7 чить. Саранск ошсо целанек эпидпорогось кастозь 3 целат 4 десятойть процентс, 14 иес эйкакштнэнь ютксо – кемкавсковос. Цифратне аволь покшт. Ормалгадыцятнень ламолгадомась учови сы иень якшамковсто. Эряви тешкстамс, гонконгонь грипптенть 1960-це иенть прядовомсто кулость малав миллион ломанть. Ней врачтнэ содыть, кода кардамс те орманть, эряви ансяк шкастонзо тенст пшкадемс.