Мордовияса касы ОРВИ-са и гриппса сярядихнень лувкссна (В Мордовии растет число заболевших ОРВИ и гриппом) МОКША

5-це номер Республиканскяй клиническяй больницяса анокласть инголькиге урмать врьгятеманцты. Сексеста ушедомок кармасть тиендема вакцинат гриппть эзда. Кода корхтайхть врачне, соньфтемонза ломантти сяда стака тюремс урмать каршес.
Тя больницяса, МР-нь здравоохранениянь министрть мярьгоманц коряс, 24 частста панчсть отделения 40-нь вастс гриппса и ОРВИ-са сярядихненди. Кафта шиста тяза путф 34 ломань. Тяда башка, тяфтама отделения ули и инфекционнай больницяса.
Тячиень шити республиканскяй инфекционнай больницяса «ОРВИ» и «Грипп» диагнозть мархта ащихть кафта сятта лама ломань. Фкя сярядить, 9 кизоса шабать, урмац стакалгафтось пневмонияса. Республикасонк «Свинной грипп» диагноз путф 57 сярядинди, урмать эзда кулофт аш. Врачне тага весть лятфтасазь ломаттненди: кда тинь марясасть, што сярятьксттада, тяда надия эсь лангозонт, а моледа поликлинникав.
Етай недялять республикаса гриппса и ОРВИ-са сярятькстсть 2212 ломань, тя недялять – колма тежяньда лама ни. Синь эздост 72 путф «Грипп» диагнозсь. Кода корхтайхть специалисттне, эпидемическяй порогсь тячи етаф велькска, но эпидемия Мордовияса аш, а тя показательхне пцтай фкя лацоннет январь-февраль ковста эрь кизоня.