Мордовиясь аноксты «Этнографиянь покш диктант» акциянтень. (ЭРЗЯ)
Ютамо сон карми сундерьковонь 3-це чистэ. Те иестэ сонзэ сёрмадомантень регионсонок анокстыть 26-во площадкат. Акциянтень вейсэндить республикань весе районтнэ. Диктантонть вельде Россиянь эрьва эрицясь вансы, кода содасы минек масторсо эриця раськетнень историяст, культураст, коест-кирдаст. Мордовиясо ютавтыцякс кармасть национальной политикань, культурань, туризмань ды архивень тевень коряс министерствась, Рав кужонь финнэнь-угрань раськень культурань курось ды образованиянь министерствась. Бути ютазь иестэ этнографиянь покш диктантонть сёрмадсть вете таркасо, ней ансяк Саран ошсо анокстыть 4 ды 22-во кармить буетнева. Этнографиянь коряс эсест содамочист ютазь иестэ варчизь 600 ломанть. Весероссиянь рейтингсэнть Мордовиясь кармась сисемеце таркасо. Средней баллось сядотнень эйстэ ульнесь 66. Теде башка минек регионсто ульнесь сех сыре сермадыцяськак. Кевкстематне кармить аволь шождатнень эйстэ. Штобу максомс виде каршо вал, эряви парсте содамс культуранть, этносонь геройтнень, весе раськетнень содавикс таркатнень. Те иестэ цётамотне кармить ванновомо аволь Россиянь субъектнэсэ, а Московсо. Ванномань куншкакуронь специалисттнэ ютавтыть регионтнэнь коряс анализ ды ливтьсызь изницятнень. Мордовиясо изницятнень каземась карми ацамковонь 11-це чистэ.