Мордовиянь творческяй коллектифне якасть кштимань фестивальс Башкортостану (Творческие коллективы Мордовии приняли участие в танцевальном фестивале в Башкортостане) МОКША
Мордовиясь кирди кеме соткст финно-угорскяй сембе аймакнень мархта. Етай ваймамань шитнень Башкортостанца етась марийскяй кштимань фестивальсь-пялькстомась. Тя илати тертьфтольхть ансамбльхть и минь республикастонк. «Ший кандыра» или «Серебряная веревочка» межрегиональнай фестивальсь-пялькстомась Башкортостанца етафтовсь ветецеда ни. Пингстонза няфнесазь маштомашиснон аф аньцек Башкириянь кштимань коллектифне, но и Татарстанонь, Марий-Элонь, Удмуртиянь, Свердловскяй областень. Кизоста-кизос синь лувкссна кассы. Кда 2012-це кизоня фестивальса ульсь 760 участник, то тядде эздостоль 1000-ть малава.
Фестивальса-пялькстомаса няфневи шинь стяма ширень мариецнень кштимань традиционнай культурасна. Но илати фалу терневихть инжикс финно-угорскяй лия народностть. Тядде тяфтамкс ульсть мокшень и эрзянь морамань и кштимань ансамбльхне. «Поюнясь», «Парынзась» и «Диголясь» Башкирияса няфтезь минь культураньконь эсь лацонь и мазышинц. Кода пачфтезе тейнек Ольга Кулаева, Рав кужень финно-угорскяй народонь культурань центрань покодись, республикастонк коллектифне казьфтольхть дипломса и питни казнеса.
«Кандыра», а мокшекс — «Пикскяня» — тя марийскяй кштима. Сон мольфтеви «8» цифрать корява. И тя кштимась-пикскянясь арай эсь лацонь сотыкс Шкайть и модать лангса эряйхнень еткса. Пингстонза кштийхнень лангс вярде бта валги сетьмоши, конанц вельде мариецне эряйхть фкя-фкянь шарьхкодезь.
Фестивальть эсь лацонь шиц сянь эса, што концертнай программать аделамдонза меле сонь участниконза и инжиенза арсихть фкя-фкянь мельге и кштизь тиихть эсь лацонь пикс. 2013-це кизоня сонь кувалмоц ульсь 2300 метра. Тя ульсь мировой рекорд «Масторлангса инь кувака шинь стяма ширень марийскяй кштимась» номинацияса. Тя сатфксть колга пачфтьфоль Гинессонь рекордонь книгать аноклаензонды.