Мордовиянь Раськень сермадеентень А.М. Дорониннэнь – 70 иеть! (ЭРЗЯ)
Протасовань кавксо классонь школань прядомадо мельга Александр Доронин туи тонавтнеме Ицялонь педагогической училищав. Тосо ушодсь якамо литературань курос. Поэзиясо васень эскелькстнэнь лездась тензэ теемс Мордовиянь раськень сермадеесь Василий Кузьмич Радаев. Сон тонавтызе од церанть ваномс эрямонть лангс лиякс, неемс перть-пельксэнь мазычинть, вечкемс тиринь келенть. Горький лемсэ Московонь Литературань институтсо тонавтнемстэ Александр Доронинэнь лиси «Чачома ёнкс» васенце валморонь пусмомзо. Теде икеле, сонзэ стихензэ лиснесть Игнатбуень, ицялонь райононь ды «Эрзянь правда» газетатнесэ ды «Сятко» журналонь лопатнень лангсо. Литинститутонть прядомадо мейле Александр Макарович- «Эрзянь правда» газетасо собкор. Косо сон бу аволь важоде, эрьва таркасо парсте тейсь тевензэ. 1993-це Мордовиянь книгань издательствась нолдызе Александр Доронинэнь «Кочкодыкесь – пакся нармунь» романонть. Те неень шкань эрзянь велень лирической хроника. 95-це иестэ – «Баягань сулейть» Те романсонть панжови Никон патриархонть образось, самай те книгась кармась изняцякс «Литературная Мордовия пелькстамосонть. Александр Макаровичень сюпав шкинемазо. Минек республикань творческой интеллигенциядонть Александр Макарович нолдась «Кинть ютасы молицясь» очеркень книга. «Чилисема» эрзянь эйкакшонь журналонь прявт редакторось Николай Ишуткин содасы Александр Макаровичень ламо иень перть. Сынст ютксо алкуксонь ояксчи, конась иеде иес ансяк кемексты. Александр Макарович Доронинэнь произведениянзо ютавтозь маринь, удмуртонь, чувашонь кельтнес. Истя жо сонзэ сермадовксонзо совавтозь школань учебниктнень программас. Литературно-творческой важодеманзо кисэ казезь Верховной Советэнь Президиумонь Почетной грамотасо, СССР-нь Писателень союзонь правлениянь Шнамонь коневсо. Сон – Мордовиянь Ленинэнь комсомолонь премиянь лауреат. Истя жо Александр Дорониннэнь максозь «Мордовия Республикань Заслуженной писатель» ды «Мордовия Республикань Народной писатель» лемтне. Иензэ лангс апак вано, Александр Макарович важоди весе вийсэ, сон сёрмады, вешни од образт. Минек редакциянь важодицятне чачома чинзэ кувалма евтыть седейшкавань поздоровт, арсить кеме шумбрачи ды творчествасо од изнявкст.