Мордовиянь Прявтось Владимир Волков совась «Единая Россия» партиянь Высшей советс. (ЭРЗЯ)

Якшамковонь 21-22-це читнестэ Московсо ютась «Единая Россия» партиянь 16-це инекужось. Тосо роботасть 3 тежадо ламо ломанть – делегат, профильной министерствань представительть, Госдумань депутат. 696 делегаттнэнь эйстэ 8-тне невтсть Мордовиянть. Инекужосонть ульнесь и республикань прявтось Владимир Волков, конань кочкизь «Единая Россия» партиянь Высшей советс. Мордовиянь прявтось тешкстась: «Инекужосонть путовсь питне промышленностень, велень хозяйствань ды лия отраслятнень касомантень. Ульнесь яволявтозь, што весе неть енкстнэсэ роботы «Единая Россиясь». Теде башка партиясь топавты и эсензэ партийной проектнэнь, саемга, одтнэнь ютксто вейкесь – «Наш двор» проектэсь. Кортамось моли эрямо кудотнень вакссо таркатнень, подъездтнэнь витнемадо-паролгавтомадо. Инекужосонть кортавсь, мезе эряви теемс не направлениянть коряс. Ламо мель явовсь велень хозяйствантень, тешкставсь, што те проектэсь ашти приоритетнойтнень ютксо. Аграрийтненень, кода икелеяк, карми максовомо лезкс. Инекужосонть кепедевсть социальной сферантень, здравоохранениянтень, образованиянтень ды наукантень седе товгак лезксэнь максомадо кевкстематне. Владимир Волков мерсь: «Евтан покш сюкпря минек кочкицятненень, «Единая Россияс» весе совицятненень. Се тевесь, што монь совавтымизь партиянь Высшей Советс, а Владимир Чибиркинэнь ды Василий Пискаревонь – Генеральной советс, корты «Единая Россиянь» прявттнэнь минек региональной отделениянтень кемемадонть. Те покш питне Мордовиянь роботантень».