Мордовиянь поисковиктне велявтсть раськеютконь экспедициясто. (ЭРЗЯ)
Новгород ёнкссо прядовсь “Волховский фронт. Чудово” раськеютконь военно-исторической экспедициясь, конасонть ульнесть 42 поисковикть Мордовиясто. Вешнемань важодемась мольсь Любанской операциянь ютамо таркасо, Спасская Полисть веленть маласо. Мордовиянь отрядонть прявтсоль Николай Кручинкин.
Се таркасонть ещё Советской Союзонть пингстэ ушодовсь поисковой движениясь. 1945-це иестэ Николай ды Александр Орловтне ялакстнэ васенцеде уставасть мукшномо маштовозь солдатнэнь, пурнасть документэст, пачтясть куломадост раськетнень туртов. Эряви тешкстамс, те экспедициясь ульнесь тонавтнемань. Ансяк сыцятне 5 чинь перть кунсолость лекцият, а экзаменэнь максомадо мейле, сынськак кепедсть маштовозтнень.
Челябань отрядось муизе ды таргизе самолётонть, конасонть ливтнясь лётчикесь Алексей Зеленский. Лездасть тенст кемень ломанть Мордовиянь отрядстонть. ЛаГГ-3 самолётось-истребителесь, конасонть сон ливтнясь, тапазель 1942-це иень панжиковонь 8-це чистэ. Од ломанесь прянь апак вансто тюрсь ятонть каршо. Подвигенть кисэ казезель “Якстере Знамя Орденсэ”.
Экспедициянь цётамотне истят: кепедезельть 190 Советской солдатт, самолёт, муезельть 40-де ламо медальонт, сынст эйстэ 11 ловнозельть.