Мордовиянь морской кадетэнь движениянтень 10 иеть. (Морскому кадетскому движению Мордовии 10 лет) ЭРЗЯ
Течи Саранскойсэ тешкстызь морской кадетэнь движениянь 10 иетнень топодеманть. Эрьва ие те движениясь яла касы, а кадетэкс примить тёжадо ламо тонавтницят. Меельце шкастонть седеяк ламо мель явови эйкакштнэнь патриотической, культурной ды духовной воспитаниянтень. Саранск ошонь 3-це номер школастонть ушодовсь республикань кадетской движениясь. Кадеттнэде васенце ледстнематне кандовить умонь 18-це пингентень. 1716-це иестэ ине реформаторось Петр Первый эсензэ Указсо яволявтызе «гардемарин» званиянть, а аламодо седе тов те уш ульнесь Морской кадетской корпус. Ды эряви видькстамс, што гардемаринтнэ невтизь пряст, кода алкуксонь геройть.
Саранск ошонь 3-це номер школасонть кадетэкс примить 5-це классто саезь. Общеобразовательной анокстамодонть башка кадетнэ тонавтнить спецкурсонь программатнень коряс, покш мель явови тесэ спортонтень. Школасонть роботыть 10-де ламо эрьва кодат секцият. Секскак а дива, што те школасонть тонавтнить эйкакшт ошонь ловт весе районтнэстэ. Кадетнэнь марто занятият ветить военно-морской флотонь ветерантнэ ды МЧС-нь офицертнэ.
Иеде иес республикасонок касыть кадетской ды спортивной движениятне, яла седе ламо церынеть ды тейтерькат бажить молемс олимпийской ды масторонь чемпионтнэнь ёнов. Ней Мордовиясо кадетской класстнэде уш пек ламо. Сынст формаст теевсь содавиксэкс ды мельстуицякс. Вейкеяк покш тев а ютавтови од патриоттнэньтеме.