Мордовиянь краеведениянь музейсэ прядовсь «Этнографиянь таргось» (эрзя)
«Этнографиянь тарго» культурань-содавтомань акциясь Мордовиянь республикань И.Д. Воронин лемсэ краеведениянь вейсэндязь музейсэ ютавтови аволь васенце ие ды сонензэ явови покш мель. Кудораськень иенть лувсо акциянь мероприятиятне алтазельть Мордовия Республикань раськетнень кудораськень питнечитненень. М.Е. Евсьевьев лемсэ МГПУ-нь тонавтницятнень туртов ютавтозель М.Е. Евсевьевень содавикс монографиянть коряс «Налксетяно урьвакстома» интерактивень мероприятия. Од ломантне аволь ансяк содавтовсть сокицянь-видицянь кудораськень койтнень марто, тень пингстэ теевсть коень пельксэкс.
«М.Е. Евсевьев. Ученый. Просветитель. Педагог» невтемаванть авторонь экскурсиянть кунсолызь эйкакшонь 2-це художественной школань тонавтницятне. Сынь содавтовсть содыенть раськень тонавтомасо путовксонть марто ды ваннызь, Мордовиянь ёнксонь велетнесэ сонзэ кедьсэ пурназь, лия ёнов а молиця коллекциянть. Ютазь иетнень сокицянь-видицянь кудораськесэ эйкакшпингеде, налксематнеде ды налкшкетнеде кармасть содамо Саран ошонь 41-це школань 4-це классонь тонавтницятне «Эрьва кудынесэнть эсест налкшкеть» шкинемань тонавкссо. Сынь аволь ансяк кедьсэст кирдсть раськень някань теевкстнэнь, ды коень «кувадкань» ёнксонть коряс теизь эсенсетнень.
Овсе курок учови акциянь поладомась.