Мордовиянь кедьчелькев ломантненень ули мезе невтемс инженек туртов. (ЭРЗЯ)

Республикасонок весе вийсэ моли пильоскань коряс Масторлангонь чемпионатонтень анокстамось. Весе виест тенень путыть сувенирэнь анокстыцятнеяк. Региононь содавикс промыслатнень ютксо – матрёшкась! Тиринь ёнксокс ловови Теньгушевань буесь. Елена Буртасовань лемесь Теньгушевань буесэ содавикс. Кеветее иеде ламо сон мазылгавты матрёшкат. Тонавтнесь художественной школасо, соды, кода топавтомс те тевенть. Ансяк алкуксонь артыцякс теевсь шкань ютазь. Аштесь вишка эйкакш марто, ульнесь ютко шказо. Сеске чарькодсь – сеть мельтнень, конат ульнесть школасо тонавтнемстэ, ней карми топавтомо чувтонь налкшкетнень лангсо. Ней сонзэ туртов те вечкевикс важодема, кона канды ярмакт. Артомань тевентень тонавтызе сазоронзо. Тетяст лакси чувтонь някатнень, а кавто тейтерензэ мазылгавтыть эйсэст. Эряви меремс, Теньгушевань буесэ те промыслась умонь шкасто саезь ульнесь кудораськень. Секскак весе салавачитне ёвтневильть ансяк эсест юткова. Истят артыцятне, кода Елена Буртасова, артомо маштыть эрьва кодамо чувтосто теезь кедьёнкс ланга. Улевель ансяк мезе ланга артомс! Теньсэ лиясто эрсить стакачить. Кеме сюлмавомат Теньгешевань артыцятне кирдить Обран ёнксонь тоцицятнень марто. Вознесенской буень Полх-Майдан велесь, кода и Теньгушевась, кезэрень шкатнестэ саезь ловови матрёшкань теемань таркакс. Тостонь кедьчелькев ломантне чувтосто маштыть тееме эрьва мезе. Эрьва артыцянть мельсэнзэ артомс покш някат эсензэ техникасо. Елена мазылгавтсь кеветее някасто аштиця матрёшка. Теде башка артыть эрьва мезть: керсемань лазт, эрьгть, пилекст, вишка паргинеть, магнит лангсо сувенирт. Теньгушевань артыцятнеде содыть аволь ансяк маласо аштиця оштнэсэ. Курок, пильге оскань коряс Масторлангонь чемпионатонь шкасто, сынст теевксэст кармить невтевеме инженек туртов, конат сравтсызь сынденст кулянть масторонь келес.