Мордовиянь гимнань валхнень автороц Сергей Кинякин васьфнесы эсь юбилеенц (МОКША)

Мокшень  поэтсь Сергей  Васильевич  Кинякин «Мон павазуван» стихотворениясонза сёрмадсь:

Эрь кизось – аськолкс сяда валда  эряфти,

Эрь кизось – пацят сяда кайги мороти…

Тяфта  сон мярьгсь   эсь эряфонц и творчестванц колга.

Сергей Кинякин шачсь тёжянь  вейхкса сятт  колмогемонь  сисемце   кизоня  комсь нилеце сентябрьста Москуса.  Алянза-тядянза мокшетольхть. Курокста  синь мрдасть Зубово-Полянскяй райононь  Пичпанда вели, ускозь мархтост  моронь кельги  мокшень мастору   ёмла  Сергейньге.  Школать  аделамда  меле кармась  тонафнема Мордовскяй государственнай  университетонь  филологическяй  факультетса. Лама киза  работась редакторкс Мордовскяй книжнай  издательстваса, сяльде – ответственнай секретарькс «Мокша»  журналса, ульсь Мордовия Республикань Писателень Союзть правлениянц оцюнянцты полафтыкс.  Нолдась   мокшень и рузонь кяльса стихонь кемонь сборникт. Но башка васта  творчествасонза занци Мордовия Республикати  гимнань сёрматф валонза. Сергей Кинякин рьванц Верань мархта касфтсь  кафта шабат: стирьсна Светлана и цёрасна Евгений. Синь фалу маласонзот и пяк кельгсазь эсь аляснон. Сергей Васильевич Кинякин – Российскяй Федерациянь Писателень Союзу  сувси,  Мордовиянь   комсомолонь  премиянь лауреат,  МР-нь  заслуженнай  поэт. Сонь стихонзон  лангс ладяф моронзон  морсесазь Мордовиянь содаф артисттне. Арьсетяма   Сергей Васильевиченди  кеме шумбраши, паваз и нинге  сяда ламняс эрямс.