«Мордовия мастеровая: традиции и современность» невтемась (ЭРЗЯ)
Ансяк вейке чис Пушкин лемсэ ловнома кудось кармась улеме раськень тевветямонь курокс! Орозбиёнь понань кемтне — эрьва -кодамо тюссо, покшт ды вишинеть — региононок содавикс тешксэсь! Кевердемань салавачитнеде ёвтни мастерэсь Юрий Аксёнов. Понань ламо тюссо кевердемась Орозбиёнь школань тонавтницятнень сех вечкевикс тевтнень ютксто вейкесь. Эсь кедьсэ, оймень путозь, тейтернетне анокстыть понань артовкст, мазыльмат, налкшкеть ды цецят. Важодемась а шождатнень ютксто, саи ламо шка. Теке марто цётавксось – свал мазый теевкс!
Орозбиёнь эрицятне мелень путозь анокстыть футболонь коряс весе масторонь чемпионатонтень. «Мордовия мастеровая» невтемась кармась улеме алкуксонь покшчикс искусствань весе вечкицятнень туртов! Сыцятнень ютксо — Гангеевтнень кудораськесткак.
30 ламо иеть раськень хуждожественной шкинемантень яви покш мель историянь наукань докторось Александр Лузгин. «Народные промыслы мордовского края» книганзо презентациясь- ванномань-тонавтнемань цётамо ды региононок эрямопингень сюпав тевкадовксонь паро невтема. Проектэсь ютавтови э/м раськень регионъютконь общественной вейсэндявксонть арсеманзо коряс. Кода тешкстась прявтозо Юрий Мишанин, прявт путовксось- ледстямс ды лездамс тиринь ёнксонь ёроков ломантненень. «За межнациональное согласие» медальсэ казезь Орозбиёнь велень администрациянь прявтось Александр Аржаев. Шнамонь конёвт, сюконямонь валт сетненень, кить ванстыть раськенек тевветямотнень течинь чис.