Мокшень Козловка велень школать эряфонц колга (МОКША)
Сай кизоть эзда школась тяшкстасы кемонь кизонь юбилеенц. Тя пингти сон пачкотькшни оцю сатфксса. Сувамста кивок сельмованфть саласазь каготста тиф эрь кодама налхкшне, конатнень эса тиендихть сембе школань покодихне. Тонафнемань кудть потмоса лама казняда, конатне сатфтольхть спортивнай, научнай , культурань пялькстамаса. Мокшень кялень урокне школаса ётафневихть аф фкя лаца. Ёмла классонь шабатненди тиендевихть ёфксонь лаца сценкат, штоба синдейст улель кода семботь лацкас мяляфтомс и шарьхкодемс. А нинге иттне пяк кельгсазь азондомс стихотвореният. Сяда оцю класснонь эса шабатне тонафнихть эрь кодама валмуворкст, валсюлмот, ребуст. Тейст ули кода кярьмодемс и мокшень кяльса прозати и азксненди. Вейхксоце и кефкие классонь иттне тонафнесазь сембодонга стака тематнень, но синь и сембодонга мялень салайхне. Пяк пара ся, што тонафтысна од специалист и синь фкя фкянь эса пяк лац шарьхкодихть. Башка вастса ащи библиотекась, конац сувафтсь потмозонза лама сядот книгада. Тяса ули мокшень книгань уженя, конанди иттнень ширде шарфневи пяк оцю мяль.Ули тя школаса стирнятнень эсь кельгома тевсна – котф лангса стамась. Тя покодемати тяса аноклаф специальнай класс. Маштомашиснон синь няфнесазь трудонь урокнень и стамань кружокнень пингста.Лисевомок школаста ули кода няемс эйнь площадкать, коса ётафневихть физкультурать урокне, конатнень пингста иттне курькснихть конькаса и налхксихть хоккейса. Кода азондсазь синць шабатне, тяфтама курькснемада меле и тонафнемска моли сяда нине кепотьф мяльса. Кода корхнесть нинге сиретне: Велесь эряй ся пингс, мъзярс кармай улема школа. Мокшень Козловка велеса сон ули и нинге аф фкя киза эрекста кармай мольфема эсь покодеманц, сяс мес шабатне тяса шачендыхть фалу!