Митрополит Саранский и Мордовский Зиновий васетькшнесь МГПИ-нь студенттнень мархта. (Митрополит Саранский и Мордовский Зиновий встречался со студентами МГПИ) МОКША
Васедемась лемтьфоль кафта оцю праздникненди: Очижити и Сяськомань шити. Священнослужительхнень и педагогическяй институтонь тонафнихнень мархта тяфтама кеме сотксне кирдевихть фкя-фкянь ёткса фалу. Сай пингонь учительти сявомат мяльс и религиознай кизефкснень, штоба шарьхкодемс синь лацкас и пачфнемс емлатненди. Духовно-нравственнай воспитаниясь тячиень шить ащи аф мекольце вастса. Педагогическяй институтонь конференц-залти ашесть тялькфтав сембе, кит ёрасть васедемс Зиновиень мархта, мяльсна ульсь кулемс, кода кемамс шкайти и кода тя тиендеви од ломаттнень эряфса. Пуромкссь ушедсь концертть эзда, конань аноклазь «Васяльга» фольклорнай ансамблянь стирнятне и ширеста сярьгятьф артисттне. Сяда тов митрополитсь Зиновий студенттненди пачфтсть Очижить васьтеманц и етафтоманц колга, сянь квалма, што тядде шкаень илась савсь марса майнь праздникнень мархта. Церькавть и од ломаттнень еткса сотксонь кирдемать оцю мяльса васьфнесы институтонь ректорсь Василий Кадакин. Сяс сон инголькиге ерась штоба васедемаса кеподевольхть эряфонь стама кизефксне, конат таколфтсазь студенттнень. Священниксь шарьхкодеви кяльса пачфнесь стакатнень квалма, конат шоряйхть оттнень эряфса и кода аф максомс пря ня тапарксненди. Васедемась етась пяк мялень салазь. Зиновий корхтамдонза меле, сярьгядезень студенттнень, штоба синьге сяда активнайста участвондальхть духовно-нравственнай воспитаниянь кизефкснень эса эсь мяльснон азондомаса. Макссельхть кизефкст. И меколи институтонь оцюнясь азсь мяль, штоба тяфтама васедематне поладовольхть и сяда тов.