«Межэтнической журналистикань школа» проектэсь полады роботанзо. (ЭРЗЯ)
Эрьва вастовомась алтави башка, мелень саиця теманень. Меельце вастовомась алтазель эрзя-мокшонь раськень вейсэндявксонь 25 иетненень. Кортамось мольсь «Масторава» вейсэндявкстонть седе, кода весе ушодовсь, ламо кортасть Мордовиясо молиця тевтнеде, тиринь кельтнень тонавтомадост, культурань ванстомадо ды сюпалгавтомадо. Межэтнической журналистикань школань аволь весе тонавтницятнень туртов те тевесь ульнесь содавикс. Секскак арсезель, тонавтомань вейке чинть алтамс те тевенть марто содавтомантень. Вастовомантень тердезельть сеть ломантне, конат аштесть покш тевень ушодкссо. Курсань кунсолыцятне явсть мель эрьва кортыцянтень ды пештизь содамочист. Тешкстама, вейсэндявксос совицятнень мелест коряс ульнесь ютавтозь васенце Инекужось самай тосо кепедезельгак кевкстемась минек кельтненень государственной статусонь максомадо. Ули кемема, што весе ёвтазесь кадови од ломантнень мельсэ свалшкас. Ды кодамо ки эрямосонть бу сынь авольть кочка, тиринь историянь содамось кадови тенст паро невтемакс ды превспутомакс.