Межэтнической журналистикань гильдиясь полады «Межэтнической журналистикань школа» проектэнть. (ЭРЗЯ)
Тешкстасынек, занятиятне молить вейке программань коряс РФ-нь 23 оштнэсэ. Мордовиясо те проектэнть коряс важодемась юты «Эрзянь правда» газетань редакциясо. Школась ушодызе роботанзо 2010 – це иестэ, сонзэ лувсо эсест ёрокчист кепедить сеть журналисттнэ, конат уш важодить, эли кармить важодеме межнациональной тематнень коряс. Тонавтомань семинартнэнь ютызь Россиянь ветесядт тёжадо ламо журналистт. 2015-це иестэ саезь гильдиясь нолдась эрямос программа, конань вельде анокстыть од журналист ды корреспондент. Проектэнть лангс ярмактне явозельть Россиянь Президентэнь грантонть вельде. Занятиятнесэ кармить кортавомо СМИ-сэ межэтнической тематнень башка ёнкстнэ, сеть стакачитне, конатнень марто вастовить те тематикань коряс сёрмадыця журналисттнэ. Тонавтницятнень содавтсызь федеральной сайтнэнь ды региональной изданиятнень марто, косо васняяк сёрмадови этнической тематикадо. Ней школасонть тонавтнить кемколмово од ломанть. Курсатнень прядовомадо мейле кунсолыцятненень максови сертификат.