Мелень саиця покшчисэ ды концертсэ васты Мордовиянь композиторонь вейсэндявксось 35 иень топодеманть. Юбилейной мероприятиятне ушодовсть ды кармить молеме маласо тарготнень перть. (ЭРЗЯ)
Композиторонь вейсэндявксось ульнесь пурназь 1982 иень даволковонь 26-це чистэ. Те покшчинтень ветясь раськень музыкань культурань касомань кувака ды аволь свал шожда ки. Мордовиянь профессиональной музыкась кеместэ сюлмавозь Кирюковонь ды Воиновонь лемтнень марто. Васняяк, 1955-це иестэ раськень шкинемань кудонть юрсо панжозель Мордовиянь композиторонь вейс пурнавома. Прявтокс кочказель Леонтий Петрович Кирюков. Седе тов Мордовиянь композитортнэ ды музоковедтнэ совасть Верхне-Волжской композиторонь вейсэндявксонтень, самай сон кармась республикань композиторонь вейсэндявксонь лавсекс. 2002-це иестэ саезь Мордовия Республикань композиторонь вейсэндяксонь прявтокс кармась МР-нь раськень артисткась, искусствань заслуженной деятелесь, Республикань Прявтонь премиянь лауреатось Нина Кошелева. Чадыковонь 3-це чистэ Леонтий Петрович Кирюковонь лемсэ музыкальной училищасонть ютась концерт, конасонть гайгсть кода национальной музыкань искусствань классиктнень, истя и од композитортнэнь произведенияст. Кода свал, покшчистэнть ламо казнеть ды паро валт.