Марианн Бернхардт Венгриясо чачозесь ёвтни эрзянь келенть тонавтнемадонть (ЭРЗЯ)
Финнэнь-угрань кельтнень ютксо эрзянь келесь ашти неявикс таркасо. Сонзэ тонавтомо бажить омбо масторонь ломантнеяк. Вейкесь эйстэст – Венгриянь докторантось Марианн Бернхардт. Марианн Бернхардт Саран ошов сась омбоцеде. Сон седе маласто тееви содавиксэкс тесэнь эриця ломантень культураст ды келест марто. Мельспаросо ёвтни эсензэ лангаяк. Тейтересь вадрясто корты венгрань, финнэнь ды англань кельтнесэ. Эрзянь келенть кармась тонавтнеме Туркунь университетсэ улемстэ. Васенце тонавтыцязо – Светлана Гаушева. Марианн пек кенярды, мекс седе домка содамочить эрзянь келень тонавтомасо макссть Огарёв лемсэ Мордовиянь государственной университетсэ. Неень шкасто Марианн сёрмады «Объектэнь падежтнень полавтнемадо» диссертация. Материалонь кочкамс аволь весть сави ардомс минек ёнксов, кона теевсь тензэ вечкевиксэкс ды малавиксэкс. Ансяк докторантонть валонзо коряс, эрзянь ды мокшонь кельтне ошсо марявить чуросто. Кизна венгрань инженть ули зярыя шказо ды сон ардтни Россиянь масторганть. Эрьва косо сонзэ вастыть пек лембестэ. Ансяк Саран ошось, куш сон вишкине, ялатеке маряви сехте ваньксэкс ды мазыекс. Кемтяно, сон седеяк кепетьсы меленть ды максы седе ламо содамочить тонавтомс эрзянь келенть аволь ансяк Марианнэнь туртов, ды весе лиятнененьгак.