«Литовась» тешкстызе 20 иень топодеманть. (ЭРЗЯ)
Пушкин лемсэ раськень ловномань кудось кармась эрзянь аватнень туртов пурнавома таркакс. Тесэ тешкстызь 20 иень топодеманть «Литова» вейсэндявксос совицятне. 200 ламо эрзянь ават совить те вейсэндявксос. Эрить аволь ансяк минек республикасо. Покшчи марто лембе валонь ёвтамо сакшность Пенза ёнкссто, Москов ошсто. 20 иетнень перть вейсэндявксось топавтсь покш важодема. Тень тешкстызь весе пурнавозтне. Редизь республикань кирдивийтнеяк. Теке марто вейсэндявксонь прявтонть, Раиса Щанкинань кортамосонть тешкстазельть сеть асатыкстнэ, конантнень лангсо эряви вейсэ ды виень путозь важодемс. Те васняяк се, што те шкас вейсэндявксонть арась эсест кудост, арась эрявикс оргтехникаст. Ды те весе топавтовиця тевть, конатнень лангсо республикань кирдивийтне алтасть арсемс.
Сцена лангсто гайсть ламо лембе валт. Россиянь финнэнь-угрань раськень ассоциациянь прявтось Пётр Тултаев тешкстызе «Литова» вейсэндявксонть виензэ, сеть тевтнень, конатне топавтовить Союзонть вийсэ.
Нама, истямо покшчи а юты казневтеме. МР-нь государственной собраниянть пельде шнамонь конёвт, Саран ошонь прявтонть пельде сюконямонь валт ды казнеть. Улить вейсэндявксос совицятнень ютксо истят, кинень ули мезень кисэ ёвтамс ояст туртов сюкпрянь валт. «Литовас» совить весе, кинь ули мелезэ, кие пии-палы тиринь раськенть кисэ. Тесэ вастыть ды явить мель эрьвантень. Эрзянь аватне топавтыть покш тев, конань теить виень ды оймень апак вансто. Кемтяно, те вейсэндявксось васты ещё аволь вейке юбилей.