Литературань иентень. Ёвтнетяно Людмила Рябовань шкинемадо (К году литературы. О творчестве поэтессы Людмилы Рябовой) ЭРЗЯ

Стихень сёрмадомо Людмила Рябова ушодсь школасо тонавтнемстэ. Ветеце классо тонавтыцясь макссь истямо тев-терявтомс сёрмадомо стихть. Сестэ Люданень лездась тетязо. Васень стихензэ ульнесть пертьпексcтэнть, ялгадо. Шкань ютазь тейтересь карми сёрмадомо вечкемадо, эрямодо. Стихень сёрмадомасо ушодомсто тонавтыцякс ульнесь Любовь Дергачева, седе тов те тевенть поладызе Александр Арапов. Тонавтнесь тейтересь филологиянь факультетсэ, финнэнь-угрань отделениясо. Ней те максы тензэ покш лезэ важодемасо. Меельце шкасто Людмила Рябова  сёрмады стихть эйкакштнэде ды эйкакштнэнь туртов. Ули мелезэ нолдамс эйкакшонь книга. Ней сон пурназь. Эряви ансяк муемс лездыця, кона сонзэ нолдавлизе. «Сятко» журналсо важодемадо башка, Людмила кундась и лия тевс. Зярыя иеть теде икеле пурназель од сёрмадыцянь «Вал» курось. Аволь свал эрси истя, што важодемась тукшны мельс, канды кеняркс, максы оймамо. Людмила Рябовань эрямосо весе лиссь истя, кода эряви. Вечкевикс тевесь максы вийть. Вийтне максыть мелень кепедема, а те кепети шкинемантень мельявоманть.