Лездсь «Жилье и городская среда» нацпроектсь (мокша)
Тядде марнек петевихть 237 лама квартирань кутт, а кемонь кизоста республикань эрь районца тиевихть ваймама вастт. Тянь колга и аф аньцек мольсь корхтамась Россиянь строительствань и коммунальнай хозяйствань министрть полафтыенц Алексей Ереськонь мархта. Ванозь регионца нацпроекттнень эряфс нолямаснон и ЖКХ-са вииямань кизефкснень, а стане жа эрь кодама объекттнень, конат строяфт федеральнай лезксть вельде. Тяфтама корхтамат мольсть фкя инь цебярь проектть — «Донбассть аралайнза» скверть колга. Нинге аф кунара тя вастса ульсть гарашт, кассть кусторкст, а мазептеманц колга ашельхть и корхтамат. Эряйхне учсть одкстоптоманц и — учевсь. Лездсь профильнай «Жилье и городская среда» нацпроектсь. Строительствань министрть полафтыец васендакиге макссь питне тейнза. И нинге шназь вастть, коса сави ётафтомс одкстоптомась очистной сооружениятненди, конатнень мощностьсна 225 тёжянь кубометрат суткати. И ванозь лама квартирань куттнень строямаснон. Кизоста-кизос прябалакс ляткшни ташта коммунальнай инфраструктурась. Штоба машфтомс афсатыксть — республикась примси участия федеральнай проекттнень и государственнай программаттнень эса, коса шарфневи мяль уликс инфраструктурать одкстоптомаса и общественнай васттнень мазоптомаса. Кепотьксонди, ётай кизоть «ошень пара эряфть» нолямаса бюджетсь ульсь 436 миллиотт цалковай, а вов «ару ведть» коряс — 164 миллиотт. Калгода лятксненди — 1 миллиард 200 миллиотт цалковай. Мекольдень 5 кизотнень Мордовияса мазептфт 46 общественнай вастт, 300 лама куттнень перьфсна.
А 15-це мартста федеральнай проектть видеса ушеды аймакнень мазептемаса вайгялень максомась. А шачема вастть мазоптомаса кирдемс ширенц ули кода госуслугать вельде республикань эрь ломанти.